ПОКАЯННЫЙ КАНОН, СОСТАВЛЕННЫЙ ИЕРОМОНАХОМ ВАСИЛИЕМ (РОСЛЯКОВЫМ)
Песнь 1
Ирмос1: Разступися, пучина чермная/ и ублажи стопы Израиля уничиженнаго,/ сомкнувшися же мглою и бурею/ над главою гордости Египетския,/ Господа прославивши во веки/, яко истиннаго Судию и Избавителя.
Припев: Помилуй мя, Боже, помилуй мя!
Идеже обрящу начало зла моего? Окрест воззрю и содрогаюся, внутрь обращуся и возболезную, яко тьма горькая обстоит мя. О, Звездо единая, Христе Спасе мой, достигни мя лучами благодати Твоея.
Со Адамом ныне сокрушаюся: како воспою Света утеряннаго? Како возвещу Истину оставленную? Аще реку, яко не видех Господа, камни возопиют, обличающе мя. Камо пойду, презрев Тя, Спасе, Путь и Истина Сый, Христе?
Слава: Не имам, Господи, витийства высокаго, не вем глаголов премудрых, но яко и отцы наша от века, взываю Ти: помилуй мя, Боже, и спаси мя.
И ныне: Не покрыю лукавством лютых моих,/ но вся возвещу Тебе Дево Чистая,/ обаче не смирения полон творю сия,/ но безстыдства потаеннаго/. Ты же кротости Источниче Пречистый,/ омый окаянство души моея/ и целомудрие во мне оживи.
Песнь 3
Ирмос: Единому дню времена уподобляя,/ вечности начертание показал еси, Господи,/темже во храме славы Твоея лики составляются,/ несть свят разве Тебе, Господи, взывающе.
Колико одежду раздеру, окаянный, и покоя достигну? Колико пепла возложу на главу срамную мою и не иму помышлений лютых? Коим вретищем покрыюся и не узрю беззаконий моих? Всуе мятуся, ища покаяния. Но Ты, Христе, рекий: "без Мене не можете творити ничесоже", пройди во уды моя, разсеки Словом Твоим каменную утробу мою, порази камень сердца моего и изведи источники слез.
Егда в скудости пребываю, печаль и зависть терзают мя, егда же преспеваю мало, гордостию обуреваюся неудержимою; грех алчный гонит мя, Господи. Приими сокрушение мое, Владыко, иных бо даров и жертв не имам.
Слава: Откуду прииму слезы, аще не от Тебе, Боже? Камо гряду в день печали, аще не во храм Твой, Владыко? Идеже обрящу утешение, аще не в словесех Твоих, Святый? Не отрини мене, Господи, и ныне помяни мя.
И ныне: Призри на мя, Владычице, и вся скверны моя попали, да не обешу на выю мою жернов осельский, но прах прегрешений моих принесу Христу Богу моему, и возметет от лица преклоненнаго моего.
Watch video ПОКАЯННЫЙ КАНОН, СОСТАВЛЕННЫЙ ИЕРОМОНАХОМ ВАСИЛИЕМ (РОСЛЯКОВЫМ) online without registration, duration hours minute second in high quality. This video was added by user р.Б. Мария Православная 15 February 2021, don't forget to share it with your friends and acquaintances, it has been viewed on our site 2,887 once and liked it 132 people.